హైదరాబాద్‌లో హారన్ మోతకు చెక్.. ముంబై ఫార్ములాతో కొత్త రూల్?

హైదరాబాద్ రోడ్లపై ప్రయాణమంటే వాహనదారుల సహనానికి పెద్ద పరీక్షే. ముఖ్యంగా ట్రాఫిక్ సిగ్నళ్ల వద్ద ఎరుపు లైట్ పడగానే వెనుక నుంచి ఆగకుండా వినిపించే హారన్ల మోత నగరవాసులకు తీవ్ర అసౌకర్యాన్ని కలిగిస్తోంది. ఈ ధోరణి కేవలం చిరాకు కలిగించడమే కాకుండా, నగరాన్ని తీవ్రమైన శబ్ద కాలుష్యంలోకి నెట్టివేస్తోంది. ఈ సమస్యకు పరిష్కారంగా ముంబై, బెంగళూరు నగరాల్లో విజయవంతమైన 'హాంక్ మోర్.. వెయిట్ మోర్' (ఎక్కువ హారన్ కొడితే.. ఎక్కువసేపు ఆగాలి) విధానాన్ని హైదరాబాద్‌లోనూ అమలు చేయాలనే డిమాండ్ పెరుగుతోంది.

ప్రమాదకర స్థాయిలో శబ్ద తీవ్రత
కేంద్ర కాలుష్య నియంత్రణ మండలి (CPCB) నిబంధనల ప్రకారం.. నివాస ప్రాంతాల్లో పగటిపూట శబ్ద తీవ్రత 55 డెసిబుల్స్ మించకూడదు. కానీ, హైదరాబాద్‌లోని గచ్చిబౌలి, ఫైనాన్షియల్ డిస్ట్రిక్ట్, ప్యారడైజ్ వంటి రద్దీ కూడళ్లలో ఇది ఏకంగా 110 డెసిబుల్స్‌ను దాటుతోంది. ఇది దీర్ఘకాలంలో వినికిడి లోపం, ఒత్తిడి, రక్తపోటు వంటి తీవ్రమైన ఆరోగ్య సమస్యలకు దారితీస్తుందని నిపుణులు హెచ్చరిస్తున్నారు. దేశంలో అత్యధిక శబ్ద కాలుష్యం ఉన్న టాప్-5 నగరాల్లో హైదరాబాద్ ఒకటి కావడం ఆందోళన కలిగించే విషయం.

ముంబై ఫార్ములా ఇదే..
ఈ సమస్యను అధిగమించేందుకు ముంబై ట్రాఫిక్ పోలీసులు 2020లో ఒక వినూత్న టెక్నాలజీని ప్రవేశపెట్టారు. దీని ప్రకారం ట్రాఫిక్ సిగ్నళ్ల వద్ద ప్రత్యేక సౌండ్ సెన్సర్‌లను ఏర్పాటు చేస్తారు. రెడ్ సిగ్నల్ పడినప్పుడు ఎవరైనా అనవసరంగా హారన్ మోగిస్తే, శబ్ద తీవ్రత ఆధారంగా రెడ్ సిగ్నల్ సమయం ఆటోమేటిక్‌గా పెరిగిపోతుంది. హారన్ల మోత తగ్గిన తర్వాతే గ్రీన్ సిగ్నల్ పడుతుంది. ఈ ప్రయోగం ముంబైలో అద్భుతమైన ఫలితాలను ఇచ్చింది. అక్కడ హారన్ మోత ఏకంగా 60 శాతం వరకు తగ్గినట్లు తేలింది. ఇదే విధానాన్ని బెంగళూరులో కూడా ప్రయోగాత్మకంగా అమలు చేయగా సానుకూల ఫలితాలు వచ్చాయి.

ఈ నేపథ్యంలో హైదరాబాద్ ట్రాఫిక్ పోలీసులు కూడా ఈ విధానాన్ని పరిశీలించాలని పర్యావరణవేత్తలు, నగరవాసులు కోరుతున్నారు. ఈ టెక్నాలజీ ఆధారిత పరిష్కారం ద్వారా వాహనదారులలో క్రమశిక్షణ పెరిగి, శబ్ద కాలుష్యం గణనీయంగా తగ్గుతుందని వారు ఆశాభావం వ్యక్తం చేస్తున్నారు.